Santiago, 27 de novembro de 2013.- O conselleiro de Economía e Industria, Francisco Conde, salientou hoxe no Parlamento que a Xunta segue a impulsar novas oportunidades para o ao naval galego con máis posibilidades de contratación para consolidar o sector, con acordos como o asinado onte entre Barreras e Pemex. Tal e como asegurou o conselleiro, a entrada da petroleira non só reforza a posición de Barreras, garantindo carga de traballo para empresa e para o sector, senón que reflicte a “solvencia e a confianza no sector naval galego e nos nosos estaleiros”.
Do mesmo xeito, Conde sinalou que este acordo supón un paso importantísimo dentro da alianza estratéxica con Pemex, que xa trae importantes beneficios para Galicia con contratos asinados para Barreras e Navantia ou o acceso a participar na contratación da renovación da flota menor de Pemex.
O conselleiro lembrou que o apoio da Xunta ao sector naval “é máis que un compromiso e así o temos demostrado”. Neste sentido, Conde referiuse a feitos concretos como o novo Fondo de Garantías Navais, a articulación do novo tax lease, xa operativo, ou a unidade de acción entre as administracións e os axentes implicados a nivel nacional, así como o paquete de medidas de apoio á contratación activado polo Goberno central.
Conde, que sinalou como fundamental apoiar aos estaleiros no acceso ao financiamento, ten apoiado a estaleiros en dificultades; ademais de incentivar a innovación como estratexia competitiva, fomentar a internacionalización, apoiar dinámicas de cooperación empresarial ou mellorar a formación especializada.
O conselleiro lembrou que o Goberno galego está sendo proactivo na procura de solucións para Navantia, co envío de propostas para o Plan Estratéxico da compañía ou co apoio á construción do dique flotante.
Conde, que asegurou que é preciso abordar a situación do naval galego con realismo e determinación para garantir o futuro do sector, asegurou que o Goberno galego traballa para que os estaleiros galegos, sexan públicos ou privados, consigan aproveitar o seu verdadeiro potencial na procura dun sector naval que xere emprego e riqueza para os galegos.
