Ortigueira, 27 de novembro de 2013.- A delegada territorial da Xunta na provincia, Belén do Campo, e o alcalde de Ortigueira, Rafael Girón, presidiron a reunión ordinaria do padroado da Fundación Ortegalia, na que se aprobaron as liñas de traballo da entidade para o vindeiro ano.
O obxectivo da programación da fundación será no 2014 continuar coa posta en valor do patrimonio cultural, etnográfico e histórico da comarca do Ortegal e o desenvolvemento de iniciativas destinadas a actualizar permanentemente os contidos do museo Ortegalia. Así, no encontro deuse luz verde a máis de 30 actividades, entre as que destacan 18 propostas formativas e divulgativas e 12 exposicións temporais dirixidas ao público. Ademais, apostouse pola incorporación de novas temáticas á oferta de iniciativas históricas e medioambientais, co ánimo de captar novos públicos.
Na mesma liña, e polo seu carácter estratéxico, desde a fundación destácase a posta en marcha do “Espacio Artegalia”, un proxecto destinado a abrir as instalacións do museo Ortegalia a todos aqueles artistas que desexen expoñer temporalmente a súa obra. A iniciativa pretende dar a coñecer e promocionar a obra de sete artistas e, en paralelo, renovar de forma continuada os contidos do centro como acción dinamizadora e potenciadora da repetición de visitas.
